當年今日
關於我們

求驗客手記:下季投銀河賺美金 沙維亞拍碧咸有睇「頭」 - 求驗客

蘋果日報 2007/05/15 00:00


外號「金毛獅王」嘅前葡萄牙國腳沙維亞,將加盟美職聯球隊洛杉磯銀河隊,同「萬人迷」碧咸做隊友。呢兩位球星都鍾意轉髮型,嚟緊美國波淨係睇佢哋百變髮型,已經值回票價喇!
曾效力過11支球隊
據講34歲嘅沙維亞今次係拒絕咗米杜士堡嘅合約,選擇同洛杉磯銀河隊簽約18個月,薪水唔慌多得過「米堡」,經理人就話佢想試吓新嘅生活形式喎!不過,我求大俠收到風話係碧咸打電話叫沙維亞去美國,大家都知呢兩位仁兄都有鋪轉髮型癮,唔通佢哋想右路合拍之餘,仲想合力帶領美國髮型嘅潮流?
講番呢位沙維亞,我求大俠真係要寫個服字畀佢,之前又受傷又服禁藥被罰停賽,都阻止唔到佢繼續踢波嘅理想。
我幫佢粗略數一數,先後效力過11支唔同球隊,足迹遍布葡萄牙、意大利、西班牙、荷蘭、英格蘭、土耳其、德國等國,加埋嚟緊嘅美國,佢遲啲出自傳嘅話,我求大俠實第一個買嚟睇啫!