【又唔做嘢】王喜諷警察憂危險取消巡邏︰唔需要三萬個咁多
蘋果日報 2019/12/25 19:25
王喜
由網媒「啱Channel」主辦的民間頒獎禮《告別大台·我們的頒獎禮》，昨晚在麥花臣場館舉行。除了《願榮光歸香港》實至名歸地成為「2019我最喜愛歌曲」外，還有《山下見》得到「最打動網民歌曲大獎」，樂隊Rubberband則獲頒「最擁抱未來大獎」等等。
其中王喜獲頒「最佳指揮交通市民大獎」，對於近日劫案頻生，有人指街上沒有警員巡邏，王喜說：「呢個就係佢哋決定用呢種態度返工嘅後果，如果警隊嘅成立同佢哋返工嘅目的，係保護他人生命及財產，佢哋必定會設定一啲方法、系統，去實現呢啲宗旨，咁而家我哋嘅警察誓章有冇保護他人生命及財產呢句？大家可以翻閱1997年之後嘅警察誓章，我就搵唔到喇。」
對於有指基層警察向上級反映，因擔心自身安危，望可取消日常巡邏（行咇）兼要求加添保護嘅裝備，王喜表示︰「我從來未見過有護頸呢樣嘢，仲要指定接載運輸，由差館去地鐵站point to point，將行咇改為喺差館待命，有call先出去，盡量令佢哋身處一個安全嘅環境，如果我覺得呢啲咁嘅要求一一被實現，我覺得唔需要三萬個咁多，因為可以比對返法國、意大利、美國，差人都係待命，冇乜巡邏，所以人手可以減啲。」
假如上述要求成立，即代表他們日常執勤的風險亦已相對減低，王喜直言是否可一併考慮取消警察們的額外津貼︰「佢哋仲有高危津貼，既然變得安全咗，呢部份嘅津貼係咪可以減省？呢啲係合理嘅推斷，人身安全咗，即係唔危險啦，高危津貼係咪可以唔存在呀？」
長此下去，王喜稱市民或要考慮開始要自我保護︰「佢哋（警察）話要駐重兵去佢哋嘅已婚宿舍，兵力分薄咗，咁保護他人生命及財產嘅力量咪少咗囉，佢哋又唔想出街，咁呢個責任就落番去市民身上，可想而知再推斷落去，日後我哋嘅舖頭就唔會再有落地玻璃櫥窗，就會返番去5、60年代，嗰啲小賣店得個有鐵支嘅窗仔，的士裝個籠保護司機，所有嘢都返番轉頭，如果嗰系列一旦實現，香港必定成為一個好多保護措施嘅城市。」
採訪：黃曉妍
攝影：仇志德、廖達燊
攝影：仇志德、廖達燊
攝影：仇志德、廖達燊
王喜獲頒「最佳指揮交通市民大獎」
王喜認為如果警察想減少巡邏，亦不用要三萬個警察之多。
王喜直言是否可一併考慮取消警察們的額外津貼。