薯片叔叔曾俊華喺特首選舉力谷休養生息論，唔少溫和民主派都好鬼buy，白鴿黨主席胡志偉唔知係咪受感染，最近仲提出特赦和解論㖭。之但係堅持抗爭嘅丐幫社民連一於話之你，嚟緊6月初至8月底續辦抗爭青年實習計劃，由創黨主席長毛梁國雄同主席吳文遠加埋一班有心人，教授抗爭秘技，咪以為一定係武鬥，文鬥一樣可以好出色，據知佢哋會教大專生點樣做政策研究、推動自己關心嘅社會議題。
八方問過文遠大將軍，佢話社民連俾政府政治打壓嘅官司特別多，所以一眾參加計劃嘅後生仔，嚟緊好多機會出入法庭，同時可以去立法會幫手睇文件，亦有機會學吓點樣組織示威，兼且使用多媒體宣傳理念，賣花讚花香話「真係好過癮」。