經常遇到一個奇景，早上繁忙時間在城巴上，全車滿座，超過一半有座位嘅人瞓緊覺，冇瞓嘅人有八成係睇緊報紙，睇報紙嘅人有七成係睇緊娛樂版，我真係覺得好奇怪，點解咁多人睇娛樂版呢，死啦！如果有日大家打開報紙發覺冇咗娛樂版咪大件事過911，點解大家有時間唔睇多本書或者研究吓港聞、經濟都好呀，做乜嘥時間睇八卦新聞呀？
我睇娛樂版嘅習慣係只看標題，快速搜畫。但係有時見到一啲相熟藝人嘅報道我都會睇吓內容，因為係朋友，會覺得幾好笑。可能對於普羅大眾嚟講，呢班陪伴住我哋十幾二十年嘅明星已經好似朋友一樣，佢哋真係關心邊個同邊個拍拖，真係關心亞邊個係咪gay。咁真係唔出奇喎，如果係咁個世界都幾美好呀。
最後一個天大嘅謬誤就係仍然有人問我：「做導演係咪有好多女搞？」救命呀！一個都冇呀！我都以為係至會入呢行。咁我當然唔會話個真相畀班八公知。我通常都會好冷靜咁答：「點可以講畀你聽，如果講咗畀你聽，我要殺咗你滅口。哈哈哈。」