邊個做特首，其實差不多。市民雖然無話事權，07已經肯定無普選，亦不妨想像一下，假如他們做特首，香港會怎麼樣。
曾蔭權做特首，每個家庭生三個響應他，雖然全港人口拍馬都及不上印度，至少半個香港面貌會大大地改變，銅鑼灣根本插針不下，維園過年宵，閒閒哋四五百萬人湧去湊熱鬧，山頂有可能要起公屋，維港填剩一條罅，昔日的海景，只能在明信片搵到。曾蔭權做特首，西九一定起得成，官商勾結的夥伴關係，不會一筆勾銷（商家不避嫌，公開挺他，撐到出面）。香港人已經習慣了地產商治港，特首姓董與姓曾，都冇所謂。咁，社會就會祥和化。家有三胎，都唔怕鬧交反枱。

唐英年一直行情看漲，但忽然遭曾蔭權拋離，由他當特首，好處是，他已是連生三子的樣辦，有仔想慳家都幾難，點都要預留額外使費。使慣了，自然不會太孤寒，向他度水，便有商量餘地。唐唐當家，扶貧雖然不會加大力度，但起碼不會劫貧濟富咁無品。唐唐也是商人出身，官商身份重叠，香港依然走資，有錢有得傾，相信一定不會像某商家講，香港是共產過共產的地方。
嫌上述兩人正路得滯，響應蔡瀾先生提議，搵周星馳做特首最好。做戲的人搞政治，唔使審，娛樂性強得多。星爺這頭黑馬，強項是不怕見光死。今天開始催谷唱好他，就算07上唔到位，還有下屆、再下屆。諗起周特首，市民無論有幾多怨氣，都會無厘頭，戇笑。