當年今日
關於我們
中環在線:陳力生歡迎下屬寸寸貢 - 李華華
蘋果日報 2011/10/12 00:00
陳力生認為要接納各人看法,先可擴闊自己思考。 資料圖片
恒生銀行(011)副總經理兼企業及商業銀行業務主管陳力生,調任零售銀行及財富管理業務主管一個月,未入恒生前,佢已經喺滙豐做咗33年,歷任個人理財業務同商業銀行業務多個高管職位。佢最近同華華講,主動邀請下屬定時向佢直接提意見,唔理啱唔啱聽,下屬隨時可以寸佢唔掂!
為乜咁樣虐待自己?佢話,家陣前線業務變得好快,所以要虛心聽前線反饋嘅意見,增加同下屬對話,先至能夠令工作不斷有進步。
當然,為免俾下屬寸,佢呢排特別忙,因為要努力執番新崗位嘅嘢,以免俾下屬挑戰話佢唔熟書。陳力生總結,管理之道在乎聆聽,接納各人看法,先可以擴闊自己思考模式。
《金融中心》版盧先亞噚日引述一位恒生老臣講,當年恒生創辦人何善衡跟同事講,要發脾氣鬧人,不如去董事長辦公房直接鬧佢消氣。原來恒生高層要受氣,係傳統嚟!