譚玉瑛係無綫元祖級兒童節目主持人，現年53歲嘅佢做足30年，到14年因節目轉年輕化而不獲續約，之後轉簽部頭約，近日佢同李家鼎主持嘅飲食節目再添食。其實譚玉瑛姐姐入行多年，形象健康，冇乜緋聞戀事傳出，佢嘅感情生活相當低調兼神秘。

近日陷冷戰

噚日有報道爆料，話譚玉瑛姐姐有一個拍拖37年嘅初戀男友周震聲（Stephen），佢早年受訪時講過唔結婚、唔生小朋友嘅不婚不育主義，所以佢哋喺愉景灣過同居生活。男友Stephen係圈外人，職業係做醫務化驗師，不過報道指佢哋喺20年前已結婚，由於相當低調，婚事只有家人先知道，又話Stephen係譚玉瑛姐姐讀中三嗰陣嘅一位數學代課老師，佢當時讀完中學，就搵Stephen補習，之後開始拍拖，疑發展「師生戀」，佢知男友唔鍾意出鏡先一直冇公開。
有指譚玉瑛姐姐同男友近排曾一度冷戰，當時傳媒亦問過佢，佢就認𠵱家關係冇乜唔妥，亦都冇否認已婚。本報噚日再詢問譚玉瑛姐姐嘅婚姻狀況，佢就以WhatsApp回應：「無論說甚麼都由它吧！」
撰文：馮仁昭