林奕匡未婚妻李靄璣（Rikko）、黃芷晴、Yuki Lovey、少爺占、仲有Supper Moment噚晚出席Swatch SKIN手錶活動。

林奕匡曾透露半年後就會喺加拿大結婚，未婚妻Rikko講到心情同籌備婚禮嘅進度就話：「原來數下仲有五個月就結，所以開始覺得緊張。本來係想喺拍拖十週年嗰日舉行婚禮，但係訂唔到場地。」

Rikko話婚禮喺溫哥華舉行，喺戶外行禮，香港會有朋友飛去加拿大參加，出年先會補擺酒，林奕匡就將成個婚禮交俾女友搞，Rikko話：「佢求婚都度咗半年，都好有誠意，所以佢話今次交畀我。」

另外，黃芷晴講到戒蒲之後，一年瘦咗15磅：「冇飲咁多酒，戒酒好啲嘅，同埋拍咗拖早啲返屋企，生活正常咗，之前返大陸拍戲同埋拍劇會食得肥膩啲，o依家反而媽咪覺得我太瘦，希望肥番3至5磅。男友都唔鍾意夜蒲，出去都係見到2000後(千禧年出世嘅人)，都係返屋企算喇。」

芷晴話自己就快生日，會同男友去大阪玩，講到爸爸媽媽對男友嘅評價：「佢哋好少畀評語，我都係會默默觀察，我諗都合格嘅。都係為咗啲小事鬧交，依家拍咗10個月，都需要時間磨合吓，我諗會再好啲。」