現年70歲嘅「火雲邪神」梁小龍捲入婚外情風波，前日喺微博忽然「撰文」同第三者表白，引起網民齊齊剝花生。不過有網民話兩年前見過梁小龍帶老婆去養生館，兩公婆好恩愛。小龍哥接受本報電話訪問時，話微博被人盜用，仲慨歎一向低調，唔知點解畀人整蠱。

對於有網民提出質疑「視訊電話的截圖怎麼解釋」，同埋相中人係邊位時。今日同一家人喺茶樓嘆茶嘅小龍哥，佢接受電話訪問時，身旁嘅囡囡仲爭住幫老竇出聲話：「我哋一家人好好呀，唔好再嚟騷擾我老竇。」代母親宣示主權。

至於網民關注嘅相中女仕，小龍哥今日回覆話：「佢係我助手，個幾月前返咗新疆，早幾年前都係跟我。因為佢屋企喺新疆，要幫屋企做生意所以返咗去。我話如果你有空，就再返嚟幫我啦，因為老婆本來跟住我去，因為仔女返咗嚟，（老婆）要陪住佢，所以一個月前打電話畀佢。」講到截圖點解會流出，小龍哥都話一頭霧水：「其實一張圖，點解仲要雞蛋裏面挑骨呢？好出奇咩，一張圖？如果問點解會出現，我都唔知呀，好似我微博點樣畀人整我都唔知，我都想知。」

精選娛聞，喺晒《娛果》
http://fb.com/appledailyent