今日有周刊報道話61歲嘅「基哥」李兆基兩年前曾中風，出入以枴杖代步，《蘋果》今日喺九龍城好好運茶餐廳搵到基哥，雖然基哥瘦咗好咗，不過腰板仲好直，精神都算唔錯，唔少街坊見到佢都同佢傾偈，基哥邊行邊接受訪問，問到佢如果有戲仲拍唔拍？基哥話：「拍得到咪拍囉！(你仲有演技喺到嘛！)老就唔得！」

基哥嘅昔日戰友志雄哥接受周刊訪問，佢話做完嘢返嚟會搵基哥了解吓近況，唔知今日有冇收到圈中人嘅電話呢？佢擰頭示意話冇，但係話晒以前佢都寫過唔少劇本，唔知喺呢方面又有冇興趣再寫？基哥話：「我做得啲咩呀？你有興趣都唔知自己做唔做到喇！」基哥仲話0依家都冇戲癮。

至於有冇對圈中人好失望？最初基哥唔想答，問多句先話：「正常㗎！幫你乜嘢呀？我0依家行動唔方便，講嘢又唔方便，人哋搵你做乜嘢呀？」基哥仲話0依家要定期去覆診，又叫大家唔好影相，話自己都冇價值，又未死。