江若琳（Elanne）同「大家姐」林淑敏今日到鑽石山荷里活廣場出席「台灣滷肉飯節」活動，講到未婚夫蕭潤邦（Oscar）斥資七位數開新鋪俾佢打理，Elanne話：「鋪頭o依家裝修緊，4月中會搞掂，其實好有壓力，因為過程入面，基本上Oscar將所有嘢都交由我負責，由裝修到餐具，佢話相信我嘅眼光，所以目前為止鋪頭籌備過程入面我哋都冇拗撬。」

本身已經定於今年年底會結婚嘅Elanne，問到今次開鋪係咪Oscar送嘅結婚禮物？佢笑笑口話：「都唔可以咁講，佢覺得我可以發展多一樣嘢，加上佢知道我係工作狂，就算結婚後都會繼續做嘢，所以係畀多個選擇我。」Elanne表示鋪頭會主打佢鍾意食嘅嘢，包括麵同鍋貼。

問到佢哋年底舉行嘅婚禮，Elanne話：「婚禮佢就冇交畀我搞啦，因為佢怕我會嚴重超支，而且已經有好多朋友幫手籌備，我都未有緊張感覺，可能到婚禮前一、兩個月先會開始緊張。」

同場嘅林淑敏就話小時候曾喺台灣讀書：「細個讀過兩年，後來轉咗去加拿大，台灣讀書嘅印象就係成日要追功課，所以如果有小朋友我都會建議去外國讀書，感覺比較自由。」

咁有冇計劃想要小朋友？林淑敏直言：「生唔唔到啦，之前因為病食藥食得太多，o依家已經生唔到。」問到會唔會想領養？佢話：「都唔會啦，因為責任太大，老公都好鍾意小朋友，不過大家都有共識唔要。」

精選娛聞，喺晒《娛果》
http://fb.com/appledailyent