一連兩個禮拜，孫柏文寫咗關於一個政府，對賭博定下正確嘅政策時，就會將呢團能燒毀社會、蠶食公務員廉潔、養肥犯罪集團嘅火，變成燃點慈善、促進和諧、給人希望嘅娛樂。
細額賭博，香港有六合彩，大陸就整咗「中國福利彩票」同「中國體育彩票」。佢哋呢兩間彩票單位，亦推出六合彩式以外嘅博彩遊戲，例如即時知輸贏嘅刷刷卡。成個大陸彩票市場投注額，每人頭計，只係香港六合彩嘅四分之一，每年亦以雙位數咁升。呢兩個彩票單位外判咗好多營運上嘅嘢，例如刷刷卡係外判商提供。其中一間就叫御泰中彩（555）。

盈利穩升　股價橫行

呢間公司以前喺香港做股票行，跟住唔小心做彩票外判商生意，做到幾年前連股票行都唔做。佢由09年來，營業額升咗六成，盈利升九成，反映每受多一注嘅成本唔係一齊上。因大陸彩票股已有好耐冇乜人吹，所以御泰股價已橫行兩年，但營業額、盈利、派息就不斷上升。喺09年中國彩票股狂炒時，啲行家話要睇長線，都要睇幾年，咁喺四年後嘅今日，就真係交出成績，不過已經冇人提。佢股價唔郁，盈利卻不斷升，市盈率得番6倍。盈利舊年升幅14%，如果用PEG等於一去計合理市盈率，佢嘅股價應係1.4元，遠比0.59元現價高，亦係幾年嘅高位。
大家可能擔心佢，早排出咗啲行使價係0.61元嘅可換股債券，即升咗有人行使沽出。我只可以話，隔離利世民話，騰訊當年（700）有批低市價七成嘅認股證喺街，畀咗邊個冇人知，不過後果就係大陸玩貿易保護主義，唔畀其他人入，騰訊盈利節節上升，股價由爆出消息嘅百幾蚊，升到今時今日突破300蚊。
呢間公司，我一路都嫌貴。不過到今日市盈率低，派息不斷增，四年來升11倍，仲唔一注獨贏御泰中彩？

孫柏文
獨立股評人
http://facebook.com/shuen
本欄逢周二、四刊出