顏仟汶同趙哲妤（Uny）等今日去到沙田出席「第廿七屆世界腦力錦標賽」擔任嘉賓。前日度過48歲生日嘅顏仟汶表示，近日馬拉松式慶祝，日日同朋友食飯，佢話：「生日願望希望身邊所有人身體健康，今年好多負面報道令自己唔開心，唔想再有呢類嘢，希望做多啲有意義事情。」

Uny笑言自己產後嘅記憶力確實下降，佢話：「啲人話一孕儍三年，我試過一日買咗兩次餸，唔記得自己食咗飯未，下個月有個朋友結婚，噚日同佢講未試條姊妹裙，佢話上個月我已經試咗，覺得自己真係冇記性，要訓練番記憶力。」

今日係Uny女兒兩歲生日，Uny話：「開心有一間好嘅國際學校收咗囡囡，下月插班讀預備班，本身小朋友有聽障，自己擔心冇好學校收佢，要戴耳機要照顧佢可能較麻煩，但小朋友好熱情，入到學校唔驚，仲攬住校長一齊玩，校長見佢咁主動就收咗佢。囡囡經歷好多病，出世早產得4磅，o依家健康成長好感恩，期待佢叫我媽媽，講說話畀我聽。」

精選娛聞，喺晒《娛果》
http://fb.com/appledailyent