韓國男星孔劉上月拍畢tvN人氣韓劇《鬼怪》後未有休息，立即開工拍廣告同為雜誌拍攝新相。等了又等，今日雜誌《High Cut》終於公開多張孔劉新相。照片中孔劉換上多款外套，以休閒造型現身，配上溫柔嘅笑容，化身暖男登場。

而雜誌更以「燦爛的服裝神」嚟稱呼孔劉，指佢於《鬼怪》16集中，唔計古裝造型，一共着過182套衫，即平均每集就以11.3套衫亮相，唔講以為《鬼怪》係講時裝嘅節目。

另外，《鬼怪》劇組原定於下星期一去泰國旅行慶功，不過今日就爆出一眾主演都會缺席。孔劉方面表示：「我哋已經盡最大努力調整工作行程，但由於佢嘅行程太多，最終確定無法參加。」李棟旭方面表示：「為咗參加旅行慶功，我哋進行過行程嘅調整，但因為一直有追加嘅行程，所以唔可以參加。」金高恩同劉仁娜因為要拍廣告而缺席，陸星材就因為要錄SBS綜藝節目《叢林的法則》，結果《鬼怪》五大主演都要缺席泰國之旅。