電視台新人輩出，成日話長江後浪推前浪，呢句話係啱，但推唔推得郁又係另一回事，薑係愈老愈辣嘅，前晚40歲嘅鄧萃雯喺街頭即席上演乜嘢叫做好戲，確係令人忍唔住直豎拇指大讚：雯女，你好嘢！

七情上面

前晚踢拖、淡妝嘅雯女喺銅鑼灣利園商場附近拍攝無綫電視劇《師奶兵團》外景，劇情講佢情緒激動當街嚎哭，痛苦得仰天大叫。
埋位前，雯女踎喺路邊同工作人員傾劇本時已經醞釀緊情緒，揦埋塊面練習大嗌表情，到正式拍攝時就即刻「嚟料」，跪喺馬路喊到七情上面，望住個天放聲喪嗌，當堂嚇到成街途人企晒喺度望住佢。
雖然只係拍獨腳戲，但雯女一take過搞掂，拍完之後仲眼淚鼻涕一齊流，不停用紙巾抹鼻，在場工作人員都讚佢goodtake。
講真前年台慶攞過「我最喜愛的實力非凡女藝員」獎嘅雯女，並唔係浪得虛名，拍場喊戲話喊即喊，完全唔使靠眼藥水，相信好多姐仔都望塵莫及，至少舊年台慶得獎後喊得好假嘅周麗淇，就要好好向對方學吓嘢。