巴西世界盃決賽周剛踢完,不過,近季歐洲主流聯賽買少見少嘅畸寶,噚日急不及待公佈新季有乜波播,仲話提早同歐聯續咗新約,去到2018球季;另外,亦會積極研究爭取2016歐國盃同2018世界盃決賽周嘅播映權。
以體育起家嘅畸寶,近季俾現在台搶咗唔少賽事,加埋連續失咗上屆歐國盃決賽周同巴西世界盃,佢哋新季似乎積極返啲,繼早前公佈攞到2016歐洲國家盃外圍賽,同2018世界盃歐洲區外圍賽嘅獨家播映權後,仲嗱嗱聲同歐洲足協傾續約,歐聯會去到2018球季;不過,歐霸盃玩埋今季,就唔會再喺畸寶播,邊個台會攞就暫時未知。除咗歐聯,佢哋就連首屆澳洲足總盃都唔放過,9月開始喺球彩台直播。