對於兒子劉鳴煒曾說過買樓論「去少啲旅行儲首期」,言論一出即被批離地,大劉撐兒子沒有講錯:「佢嘅出發點係好嘅,啲人點會受落啫?啲人最鍾意聽你使咗幾多錢呀,爭人周身債然後申請破產咪啱聽囉!我諗今日香港最有錢嘅頭一、二十人,如果係自己創業嘅,個個都係慳番嚟自己捱番嚟,唔係話有錢就去旅行,冇錢就去碌卡。但𠵱家啲人,你叫佢唔好去旅行?仲慘過殺佢老竇老母。」
大劉肉痛兒子受批評,曾勸喻他:「我上次已經叫佢唔好多多聲氣,其實佢講得好啱㗎,但啲人點會啱聽啫?」他又指時下年輕人被寵壞了:「你可以話𠵱家啲年輕人俾人寵壞咗未捱過苦,亦可以話佢哋唔係掂地,而係離地。」他說看到電視新聞很有感觸:「有一次我喺電視見到,一個青年,25、26歲左右,接受訪問話住劏房,地方好細。接受訪問嗰陣,佢拎住本漫畫,咁我心諗,如果你講到你間劏房咁細,你係咪應該去兼職?揸番一更的士又好,巴士又好,或者搵番份工。但佢唔係,佢匿喺房裏面睇漫畫,你有乜嘢可以怪人?」
大劉指年輕人有劏房住算是不錯:「我哋以前嘅居住環境曳到,老鼠通屋走。睇番以前初初,我記得我同我前妻(寶詠琴)個理想,層樓千五呎,有一百萬定期存款,我已經好滿意。」