股市唔掂，股票基金嘅成績都唔爭氣，基金投資者當然唔高興，有彈冇讚就預咗。第一樣發炮嘅自然係收費，內地基金公司就係最佳例子，08年首季基金錄得虧損近6500億銀（人民幣．下同），但基金公司就佣金照收，有關收入超過50億人仔。

管理費達280億

內地《理財周報》報道，58家基金公司中，據341隻基金嘅07年年報顯示，去年管理費收入累計達280億，比前一年大增4倍。除咗管理費，388隻開放式基金中，7隻收取嘅申購費達2%以上，收1.5%以上嘅都有19隻，此外仲有贖回費。大牛市投資者賺到錢，呢啲費用濕濕碎，但跌市投資者就同你計。
報道訪問咗一位深圳基金公司嘅發言人，佢話申購同認購費中，大部份要分畀代銷機構好似銀行、券商，基金公司賺嘅只係蠅頭小利，管理費同贖回費先係主要收入來源。
不過，正如《理財周報》位記者講，「基金公司喺基金虧損嚴重嘅情況下，多啲諗吓『基民』（基金投資者）嘅感受，調低少少管理費，或者可以贏到客人嘅尊重。」