當年今日
關於我們

【夠疊馬玩死市民】寸食環署拆漂書箱 秋生曲線:冇錢就咪學人睇書啦

蘋果日報 2017/05/03 18:46

觀塘曾鈺成黃秋生埋班

黃秋生今日去到觀塘為ViuTV節目《埋班》宣傳,節目由前立法會主席曾鈺成主持,二人今日一齊見記者,會互相煮番幾味,秋生埋位仲即刻磨刀露兩手。
黃秋生喺節目中會煮炒飯,因為快手又好食,佢話自己都成日炒飯,而且平時會煮西餐多。黃秋生未知節目內容會講乜話題,但係文化、藝術,天南地北乜都講得,佢表示現時已經退出藝發局,留番畀啲後生去爭取。
被問到會唔會喺節目入面講政治?黃秋生話:「唔知㗎,社會上嘅嘢,我又唔係專家,主席講乜我咪講乜囉。」問到黃秋生有咩想表達?秋生講笑話:「表達炒飯好食囉。」
節目係講特首埋班,咁如果主席做咗特首,秋生想做咩職位?佢話:「做食環囉,可以管理飲食、垃圾、捉老鼠同曱甴,冇嘢搞就搵嘢嚟搞,有嘢搞就當冇嘢。」
咁秋生會唔會想做財政?佢笑指識管數就發咗達,唔使咁霉啦,仲話:「我都係鍾意做食環,邊間舖旺就搞邊間,邊度賺到錢我就去搵邊間舖,帶人去踩場查牌,總之搞到佢死為止啦。」秋生有感而發咁喎?佢話:「我都係睇新聞㗎咋,話邊間鋪好就去搞邊間,好似漂書咁,香港人冇錢就咪學人睇書啦,拆咗個書箱佢啦。」言下之意,即係係暗寸指早前食環將巿民放啲舊書共享被當垃圾。
相關新聞:
西營盤社區共享漂書箱「被消失」 食環署稱接投訴清理
http://bit.ly/2oXb0Un
【獨家】曾鈺成「班子」ViuTV出台 鍾樹根出掌文化局 嫻姨做勞工局局長?
http://bit.ly/2qxNOsM