新年帶來新希望，二○○二年照睇會好景過二○○一年，但上半年恐怕仍然呆滯，要到七月過後先至逐漸復甦。理由就好簡單，日圓跌勢未止，一定對香港出口有壓力，本地出口已經連續幾個月下跌，啲廠家話仍然睇唔到幾時會反彈，所以冇法子唔等到美國消費強起嚟，日圓跌定企穩先，香港先至能夠企番起身，咁樣，講吓就好快到今年年中咯。總之出口未恢復連續增長兩個月之前，都唔可以講經濟自谷底反彈。
地產亦受日圓影響。日圓貶值，新加坡、台灣、南韓呢三個好易受政府左右嘅金融市場，亦乘機操控外滙價下滑，新加坡唔聲唔聲，趁此好機會扯低坡紙滙水，令新加坡比香港更加便宜，對爭取外資投資好有利，事關啲港元繼續升水嘅話，外資辦事處好有可能定居於新加坡也，是故香港資產價格（以港元計算）唔跌唔得，營運成本（租金、工資）亦要受壓，地產（尤其是係寫字樓）欲升乏力，公司繼續削薪裁員。此乃我哋要維護聯繫滙率嘅代價，不得不然。
日本為咗救活傷咗十年嘅經濟，一於推低日圓，唔理他國講閒話。香港人對此既冇牙力，亦無實力去反對，只可以忍忍忍，繼續埋頭苦幹，希望今年下半年會轉上康莊大道啦。
新年伊始，左丁山謹在此多謝讀者支持，祝你哋新年進步，飯碗常滿。