陳明憙今年出「黑白灰」三部曲新歌 以自己經歷為題
蘋果日報 2017/05/02 15:16
Jocelyn陳少琪陳明憙
填詞人陳少琪囡囡陳明憙（Jocelyn）最近推出首支派台廣東歌《濃霧》，日前Jocelyn喺觀塘接受訪問時透露，作品係自己作曲兼由爸爸填詞：「但爸爸今次化名做『黑海』，佢話因為大家對佢嘅作品好熟悉，唔想樂迷一見到佢名就有好多諗法，所以先用化名。」
Jocelyn話都好希望有朝一日可以幫自己作品親自填詞：「我平時都有幫Demo寫詞，上一隻碟試過填一首Side Track，但爸爸睇過覺得未夠好，唯有繼續努力練習。」
今次新歌以「黑白灰」三部曲形式推出，呢首《濃霧》就係第一炮「灰」，佢話係講述一段感情去到樽頸位睇唔到將來，係咪自己親身經歷？Jocelyn話：「係我初戀經歷嚟，當年話分手又唔分手，拖拖拉拉咗成年，好Crazy。」
至於另外兩部曲，佢話會喺今年夏天同年尾會陸續推出，一樣以情歌同自己經歷為題，o依家仲喺度創作緊：「嚟緊夏天會出「白」，係寫拍拖嘅開心事，始終點都會有開心嘢嘅。」訪問尾段，Jocelyn嘅同事突然捧住生日蛋糕現身，為啱啱25歲生日嘅佢製造驚喜。
採訪：曹家誠
攝影：陳俊強
攝影：陳俊強