韓流始祖裴勇俊去年7月同女星朴秀珍結婚，今年4月二人宣佈造人成功，現時懷孕約4個多月嘅朴秀珍未有停工，繼續出演節目《玉水洞大弟子》，雖然佢曾自爆害喜嚴重，但佢未有停工休息，日前先着上貼身裙現身活動，身形仍然纖瘦嘅佢唔似孕婦。

而近日就同22歲嘅韓國男團U-KISS前成員東浩見面，東浩擔任節目嘅嘉賓，呢位被封為「最年輕偶像做爸爸」嘅東浩，去年11月做老襯，今年5月老婆就為佢生咗囝囝，早前東浩仲大晒一家三口嘅合照，認真幸福。而東浩同朴秀珍見面後，兩人連同其他主持人都有合照，東浩將合照放上網，當中可見懷有身孕嘅朴秀珍以手輕輕護肚，今次朴秀珍就好明顯腰肢粗咗少少。

東浩喺Instagram留言：「出演《玉水洞大弟子》真係好開心，沈英順、朴秀珍、劉在煥前輩們!托你哋嘅福，好有趣咁完成拍攝!真係真係非常感謝你哋送嘅禮物，亦祝福朴秀珍前輩順產!」網民睇完呢張相都話唔知朴秀珍會唔會趁機問吓東浩湊仔關，事關佢哋同樣都係新手父母，相信有機會一齊講吓湊仔經。