韓劇《善德女王》嘅46歲女星高賢貞，前年出席活動後與45歲女星金成景結成好友，而今早金成景孖男崔成國上電台宣傳新片《救世主：回來了》時，即時同高賢貞進行電話通話，不過高賢貞卻因胡言亂語而被網民質疑當時佢係飲醉酒嘅狀態。

當時高賢貞接到電話後，口齒不清地介紹自己：「我係韓國小姐出身，冇時間吧？我係高賢貞。」就連崔成國都質疑高賢貞係咪飲咗酒，不過高賢貞就答非所問：「我係好鍾意崔成國嘅高賢貞。」及後金成景叫高賢貞為佢新片打氣時，高賢貞卻口誤稱金成景為「李成景」，雖然佢立即改口並向金成景道歉，卻更加引起網民猜疑。

有唔少網民認為高賢貞係醉酒狀態下接電話，批評高賢貞一早就飲酒係唔啱嘅行為，但亦有網民撐高賢貞冇飲酒，推測佢只係未瞓醒，更直言電台方面應該預先同高賢貞溝通好先進行電話通話。及後高賢貞所屬事務所澄清：「當時高賢貞正係瞓緊覺，突然收到電台嘅電話，喺半夢半醒嘅狀態下先講錯嘢，並非飲醉酒。」