劉德華昨日出席「Rockport與劉德華慈善樂步行」活動,fans只需買一對鞋便可以和華仔一起在山頂步行,參與的fans共有四百個,但因昨日是周末,連同遊客和圍觀的巿民,現場人數逾千。
15分鐘行五百步
行山時不少fans為求和華仔握手合照,不停衝前,險象環生,幸好全程華仔有保安護駕,而十五分鐘的活動,原定華仔要行一千步,但他在活動結束後跟記者說:「我行咗五百步之嘛。」
華仔接受記者訪問時說:「我好耐冇行山頂,最記得嘅一次係同第一個女朋友分手,嗰陣我啱啱入行,因為冇時間陪佢,所以佢搵過第二個,𠵱家我哋重有聯絡,佢已經結咗婚,佢嘅姨甥女重係我歌迷會成員㖭!」
華仔表示很少行山,多數在家玩跑步機,偶爾亦會由嘉多利山踩單車落花墟,因為戴了眼鏡和帽,所以沒有人認得他。對於山頂杜莎夫人蠟像館擺放的華仔蠟像,昨日所見蠟像已變黑,華仔說:「乜可以畀人摸嘅咩?唔緊要啦,大家開心啫。」
為20呎海報揭幕
其後華仔出席在CEONeway舉行的二十呎高大海報揭幕儀式,華仔站在平台上揭幕,馬路上因有逾千名巿民圍觀而阻塞馬路,揭幕儀式五分鐘便完畢,華仔即趕入卡拉OK替過百名fans簽名。
及後記者見華仔手上拿着喜帖,他透露是有歌迷結婚,不過昨晚他要出席梅艷芳的演唱會而未能出席婚宴,記者問他的感覺是否如嫁女,華仔說:「嫁女?話係朋友結婚得唔得呀!」
此外,華仔即將往北京拍攝張藝謀的電影《十面埋伏》,近日北京出現學童集體肚屙事件,華仔表示已向醫生取藥傍身。
採訪、攝影:胡比、陳梅香