沙膽虹早前寫過代表會計界的立法會議員陳茂波，以為坐定粒六做財政司副司長，仲一廂情願想安排埋佢條林智遠入立法會頂佢個位，試圖建立陳氏王國，沙膽虹當時亦批佢個如意算盤未必打得響，分分鐘政府架構改組過唔到，陳茂波財政司副司長做唔成，又入唔番立法會，變成雙失，點知沙膽虹仲準過生神仙，政府架構改組方案真係過唔到，之前幾個月人前人後叫佢司長叫到冧晒的陳茂波，睇怕都要食詐糊之際，梁振英夾硬安排個局長位畀佢，就是準備接替上任十二日墮馬的麥齊光出任發展局局長。
沙膽虹估計，陳茂波驚住會變雙失，今次好大機會厚住面皮接任呢個佢一啲經驗都冇嘅位置。佢口口聲聲話自己曾在建築及房地產公司工作，就以為公眾會覺得佢好有經驗，簡直侮辱人的智慧，倒不如乾脆承認自己在呢方面全無經驗吧了！沙膽虹亦曾經在工廠及貿易公司打過工，唔通就可以當貿易署長？
梁振英找一個九唔搭八的人當發展局局長，除了令人懷疑他有私心，找個聽話嘅去睇住佢的僭建醜聞外，真係諗唔到仲有甚麼理由。難道香港真的氣數已盡？
沙膽虹