【搵葉童重拍MV】「總之唔理乜膠」 鍾鎮濤:黑膠唱片較有質感
葉童鍾鎮濤MV重拍表錯七日情要是有緣
(新增影片)鍾鎮濤(阿B)今日喺尖沙嘴圓方商場,為佢兩首經典歌《一段情》同《要是有緣》重新拍攝MV ,仲搵嚟好友葉童擔任女主角。二人喺MV內延續83年上映嘅經典電影《表錯七日情》內劇情,講述佢哋喺商場內重遇。
除咗《表》之外,兩人都另外有過幾次合作,阿B話:「我哋合作食飯多,每個月都會聚會。唔講工作,大家玩起上嚟有默契。」葉童話喺拍MV期間,勾起好多當年合作嘅畫面同回憶,感覺好似噚日發生一樣。阿B當面多謝葉童出手相助:「真係唔話得,就算忙住排舞台劇都抽時間嚟幫手拍攝。」
今次MV係為阿B將喺7月推出嘅翻唱專輯而拍,除咗CD外,仲會推出限量黑膠碟,佢話:「屋企連黑膠唱盤都冇,要靠HiFi德幫手搵個唱盤。」講起黑膠碟,阿B記得當年台灣推出嘅翻版黑膠碟有好多顏色,自己以前都出過一張黃膠碟:「總之唔理乜膠啦,始終都係黑膠唱片較有質感。」問到點解會有出新專輯嘅計劃?佢話:「因為如果拍劇拍戲,我鍾意喺大陸拍,因為比較大製作,而唱歌亦都係大陸市場比較大,但作為香港仔,都希望為香港做啲嘢,唔係一定為賺錢。」問到會唔會為新碟開騷?阿B話暫時未有計劃,要視乎大家反應。
眼見著西裝嘅阿B,身型保持得好Fit,佢話一直唔俾自己太肥。係咪老婆唔俾飽飯你食?他笑話:「係呀,我瘦啲無所謂,老婆同細路要好福氣啲,代表富裕一啲。」
著上西裝嘅阿B身型保持得好Fit。(攝影:陳順禎)
鍾鎮濤搵嚟好友葉童擔任女主角,為佢兩首歌重新拍攝MV 。