零售市道步入寒冬，自由行旅客大減，不少時裝零售都首當其衝，如邱淑貞嘅老公沈嘉偉做主席嘅潮牌I.T(999)喺5月公佈業績，香港業務錄得逾7,200萬元虧損( http://bit.ly/1X9Ld4X )....

呢個唔係財經新聞，平時沈嘉偉都係講吓潮流生意，同佢班星朋友郭富城、余文樂、張智霖打吓邊爐、玩吓超級靚跑車，做開主席嘅佢原來對佢自己住緊嘅半山豪宅地利根德閣好有歸屬感。《蘋果》收到消息佢最近已報名競選參加今年業主立案法團主席一職，唔係聽錯，係上市主席想做立案法團主席一職，近日已貼晒成班候選人嘅資料係住宅大堂畀各住客瞭解佢嘅政綱，除咗沈嘉偉參選，至少有10幾個人參與，仲有Moiselle老闆陳欽杰以秘書做代表參加選做主席，兩個時裝品牌老闆由商場鬥到返屋企，真係幾搞笑。

睇返沈嘉偉嘅競選簡介，佢介紹自己已住咗係呢個屋苑有20年，仲表示：「本人有超過25年時裝零售行業及豐富的管理經驗，加入地利根德閣業主立案法團後，會聽取各方住戶的意見，致力提出更多改善屋苑居住環境及設施的建議。」據05年有報導，沈嘉偉曾以8000萬買咗呢個屋苑5個單位，畀屋企人自住同投資用途，物業保守估值逾億。

另一個候選人就係陳欽杰秘書黃小姐，係佢嘅簡介，就冇沈嘉偉個張咁詳細，只係交待佢係上市公司慕詩國際嘅創辦人同主席陳欽杰秘書身份，但就冇提及自己做主席嘅政綱，只表示協助陳欽杰管理旗下物業。《蘋果》就打畀陳欽杰太太徐巧嬌：「我哋0依家係委員。」會唔會支持沈嘉偉投佢一票？陳太表示：「未瞭解有咩人參選，瞭解完先覆你哋。」