【回帶】3大世界盃主題曲 經典重溫
重溫主題曲經典世界盃地區消息蘋地
每逢四年一度嘅國際體育盛事,總有啲歌手藝人會聚埋一齊出返首世界盃主題曲。今年就有由校長譚詠麟作曲作詞嘅《我們的夢》,雖然邀請咗好多明星嚟唱埋一份,有李克勤、鍾鎮濤,又有GEM、許志安、陳曉東等等,不過首歌一出街就引起好多負評,尤其係針對首歌又老土又難頂嘅旋律同歌詞。而《蘋地》今日就帶大家回帶睇返幾首歷屆嘅世界盃主題曲,對比一下世界盃主題曲究竟有無退步!
1. 2006年 《夢幻組合》英皇群星主唱
有Joey又有Twins,並唔係喺2006年就預演阿嬌嘅婚禮,而係成大班英皇群星晒馬踼波又唱歌,狂賀德國世界盃。英皇歌手有偶像派亦都有實力派,所以一齊jam歌睇得又聽得,首歌幾重節拍感,配合到成班歌星喺後面特技踼波。但唯一要注意嘅就係MV入面有植入式廣告。
2. 2010年 《係時候開波》MC JIN主唱
「我用中文唱RAP我覺得畢了業」,其實MC JIN的好,香港人一早就知道,所以2010年就已經有商場搵佢幫嗰屆嘅世界盃度身打造咗隻歌。唔知MC JIN係唔係想首歌大眾化啲,所以歌詞都比較直白易明,間接令到成首歌無乜高潮起伏。不過值得一提嘅係:MV有「球壇左倫右李」歐偉倫同李健和客串,都算係誠意搭夠。
3. 2010年 《旗開得勝》張學友、張靚穎主唱(2010世界盃可口可樂主題曲)
呢首歌由歌神張學友同人靚聲甜嘅張靚穎主唱,應該點都有返咁上下質素。《旗開得勝》係南非歌手K'NAAN原唱《Wagin'Flag》嘅中文版,而K'NAAN嘅版本喺YouTube都有超過1億嘅點擊率,中文版由兩個唱得之人嚟唱,加上K'NAAN亦有jam埋一份,充分體現到足球無邊界,仲有齋聽歌就已經感受到南非嘅足球狂熱。
2006年 《夢幻組合》英皇群星主唱(YouTube截圖)
2010年 《係時候開波》MC JIN主唱(YouTube截圖)
2010年 《旗開得勝》張學友、張靚穎主唱(2010世界盃可口可樂主題曲)(YouTube截圖)