大台主播駱文捷日前喺直播期間讀錯墨西哥地方名，仲講成粗口，雖然撻Q都可以話係「人之常情」，不過駱文捷撻Q都幾頻密吓，連網民都忍唔住要開post講。

網民話：
「自從有次聽住佢將『沙咀道』講錯咗做『尖沙咀』仲要講錯完之後冇更正，我就認定佢只係花樽。」

「駱文捷讀過李明逵做李明『陸』、『美國總統奧朗德』，X事數唔晒，都唔知點解仲可以做主播，基本常識都冇。」

唔止咁，喺一個天氣報告入面，駱文捷有以下嘅懶音：
「南」讀成「藍」
「北」讀成「不」
「過」讀成「個」
「講」讀成「趕」
「內」讀成「耐」
「能」讀成「lang4」

其實身為一個主播懶音有咁多，而且常有失誤，的確難以服眾。畢竟，新聞主播係一個專業。

駱文捷係香港城市大學文學士，主修語言學同語言科技。09年大學畢業後，先係入有線娛樂新聞台做主持；到11年轉到亞視新聞做記者及主播；之後去過Roadshow；到4年前加入大台做新聞主播。

雖然有批評聲迫，不過都會有人buy嘅，有網民覺得駱文捷越睇越順眼，仲話覺得佢頭髮留長啲好睇啲咁喎。呢啲嘢從來都好主觀，靚唔靚就見人見智喇。