去年北京奧運會無疑辦得成功，但京奧概念並無對中港股市帶來好大刺激作用，況且當時環球經濟受美國次按憂慮打擊，跌浪隨時開展，連相關京奧概念股於去年奧運會前後表現亦乏善足陳。
奧運概念唔會再有，去年殘留的憧憬應無再提的剩餘價值，但原來該次運動盛會其實都幫到相關公司的生意，好似內地運動品牌安踏體育（2020）最近公佈去年業績，純利勁升66%，達8.948億元人民幣，末期息加特別息總共派0.18港元，刺激股價突破過往3個月以來橫行悶局。所謂珠玉在前，安踏受惠去年京奧熱潮業績可以咁好，另一內地運動服龍頭股李寧（2331）照計無理由表現失禮，李寧在本月中業績公佈前應有伺機短炒價值，不妨留意。

江湖地位唔弱

李寧08年上半年純利3.3億元人民幣，估計全年業績應交到功課，事關論內地知名度，李寧唔會弱過安踏，業內雖勁敵環伺，國家隊亦獲外國品牌贊助，但李寧因與國家體委會關係良好，故其品牌運動服亦獲得國家隊垂青，有睇電視都會見到國家隊運動員穿上繡有李寧「嘜頭」運動衫，呢項優勢頗得坊間基金注視。不過，鑑於市況飄忽，建議待股價守穩10元時吸納作短炒，目標13元，跌穿9元止蝕。
方星俠