朱咪咪噚日娶新抱榮升做奶奶，《蘋果》今日打俾佢嗰陣，聽佢把聲勁攰，問朱咪咪噚日娶新抱，今日又做司機車個仔同襯家去機場，係咪成個人散晒，佢就笑住話:「我噚晚已經冇做司儀，佢哋有司儀嘅，不過有時興之所致揸咪玩吓之嘛。噚晚好多朋友都好俾面嚟飲，好多朋友好耐冇見，又有好多sponsor，好似啲金飾擺設都有20幾份，我哋攞晒出嚟抽獎，抽獎都抽咗好耐，皆大歡喜啦。」

咪咪姐話噚晚擺咗10幾圍，問佢有冇高歌助慶？佢話：「咪同大仔、二仔一齊唱咗《海濶天空》一首囉，年頭我哋三仔乸都喺我演唱會度一齊上台唱過。」做咗新奶奶心情點？咪咪姐話:「冇乜點，都係咁啦。」送乜嘢俾一對新人？咪咪姐話：「送龍鳳鐲同金豬，都係呢啲啦。」咪咪姐個仔喺新加坡住，襯家就住馬來西亞，佢今日分兩轉車佢哋去機場，而嚟緊佢大仔會喺新加坡同馬來西亞擺酒，真係有排高興。

朱咪咪叔仔、馬神馬德鐘噚晚都有出席飲宴，佢今日接受《蘋果》電話訪問，不忘祝賀姪仔同姪新抱：「我恭喜一對新人連生貴子，最鍾意人生多啲BB出嚟，呢個社會多啲新生命力同多啲新景象。」