【武漢肺炎】航空業斷鏈加貨運費重創中小企 租WiFi蛋公司：生意跌99%
蘋果日報 2020/03/25 00:01
爽Wifimydress武漢肺炎旅遊業網購
武漢肺炎令全球多個國家進入鎖國的緊急狀態，林鄭月娥最近更禁止非港人由海外（中澳台除外）入境本港，加上航班劇減，令本已嚴峻的旅遊業雪上加霜，旅遊周邊的產業更欠缺資助，有經營旅遊WiFi蛋的同業上月勁蝕50萬元，「捱多3個月就要放棄⋯⋯」理應吃香的網購平台，亦因為全球封城，面臨無貨賣的困境。
經營「爽WiFi」的Michael，去年發展零食業務，近月更踩過界搶攻生活用品市場，無非是想亡羊補牢，「WiFi嘅生意慘不忍睹，平時外地人來港租客佔整體生意45%，但上個月跌咗99%，每日高峯期200張單，而家每日1張或0張單，咁去外地旅遊又停咗，機場一個月租十幾萬，而家每月蝕逾50萬。」由於不是註冊旅遊機構，政府的「防疫抗疫基金」旅遊界別的援助未能受惠，至於零售業的8萬元資助，亦屬聊勝於無：「對一人蚊型公司，8萬可以出到幾個月糧，但我公司都30幾人，只係幫到每個同事一、兩千。」
有見及此，Michael已即時開源節流，例如放無薪假，減少前線兼職員工，將WiFi業務的人手轉為採購生活百貨及防疫產品，「經濟唔好，民生嘢係會賣得好啲，尤其生活用品嘅單價平均30至40元，比零食嘅20元又高返啲，而家兩項加埋每月盈利有十零萬，但都唔夠補WiFi蝕50萬條數。可能過多3至4個月，要結束WiFi生意，遲啲有機會咪東山再起囉，如果今次社會事件加疫情，你門生意都冇死，相信未來10年冇嘢可以難倒你。」
全球航空業進入告急狀態，早前國際航協表示，全球業界需要2,000億美元救助，香港政府聯同機管局日前亦公佈推出10億元紓緩措施，包括豁免徵收2019／20年度的航空交通管制費。航班劇減除了直接影響航空及旅遊業，連同周邊運輸亦影響，主力銷售日韓時裝的網購平台Mydress，因為停工及運輸成本急增問題，面臨無貨賣的困境，創辦人Leon坦言：「上個月開始已經蝕緊錢，不過而家最怕係啲貨跟唔上，工廠停晒工，最快要4月尾至5月先有新貨出到。」目前公司已無新貨供銷售，只餘下小量存貨，除了本地物流去年已加價25%，年初至今的海外空運成本更大增三至四成，大大縮減利潤本已微薄的網購平台的生存空間。
其實自去年社會事件開始，已對時裝零售構成影響，「啲人冇心情買衫，同五年前嘅傘運好唔同，當時恢復得快，但今次唔係，加上肺炎啲人唔出街唔返工，更加唔使買衫扮靚。我哋都轉型1月嗰時開始搵抗疫產品去賣，但呢啲得個top line，冇錢賺的。」Leon笑言，賣口罩賣得心驚膽戰，「全世界撲口罩，我喺韓國搵貨已經好貴，畀咗錢又驚運唔到香港，結果星期六真係運到，又唔敢同大家講係現貨，因為全世界都知公司倉庫喺邊，驚被人偷。星期六、日點完貨，返屋企又瞓唔着，星期一返到公司先敢同人講有現貨，賣口罩好似走私咁，好辛苦。」自此他決定不再銷售防疫產品，但時裝貨源跟不上，令他亦跟大隊加入超市百貨行列，「我有30萬個會員，而家唔賣衫，可以賣食品同生活用品。」
記者：陳新政
全球進入緊急狀態，航空業告急直接令到周邊產業陷入停擺邊緣。
Leon認為要轉型：「我有30萬個會員，而家唔賣衫，可以賣食品同生活用品。」
Michael坦言：wifi蛋業務月蝕50萬元，捱多3個可能要壯士斷臂。