聽日湯告魯斯（Tom Cruise）就有新戲《巴利薛爾：飛常任務》（American Made）上，不過前「湯嫂」姬蒂荷姆絲（Katie Holmes）同時又爆出戀情浮面，真係唔知攞景定贈慶！

自從姬蒂同湯告魯斯於2012年離婚之後，就傳戀上金像影帝占美霍士（Jamie Foxx），雖然戀情傳足4年，但二人一直冇承認，人前人後都好謹慎，不過英國《每日郵報》就公開二人於馬里布海灘拖手嬉水相，見證二人戀情終於浮面。其實二人一直被傳離離合合，2013年於派對共舞，但上年10月又傳過分手。美國Radar網站就爆料，姬蒂同湯告魯斯離婚時，離婚條件之一就係佢5年內唔可以公開拍拖，以免湯告魯斯難堪。不過隨住時間過去，姬蒂都漸漸變得公開，同占美霍士嬉水踏浪，非常開心。