【新增老公回應】

曾出演韓片《八月照相館》的44歲已婚女星沈銀河噚日突然傳出疑服食過多安眠藥疑自殺送院嘅消息，有指佢喺急症室進行急救後，醫院嘅VIP病房留醫，現時情況穩定，冇生命危險，仍然留醫中。沈銀河昨午表示：「因患有創傷後壓力症候群，一直靠意志克服，今次係因為服用藥物治療先入院，依家已經冇事，好快可以出院。」

而醫院有關人士今日亦透過媒體表示：「沈銀河嘅健康狀態好返好多，已經可以落床喺醫院範圍內行走散步，預計好快可以出院。」有指沈銀河今日可以出院，不過目前未有相關消息，據知沈銀河入住嘅VIP病房保安好嚴密，而大樓亦有保安禁止外部人士出入。

據韓媒《日間體育》報道，沈銀河已於韓國時間晏晝5點極低調地出院。報道指有醫院人士目擊沈銀河喺國會議員老公池尚昱陪同下離開醫院。報道又指沈銀河通過留醫嘅VIP大樓直達停車場，然後乘車離開。

及後沈銀河老公發聲明承認沈銀河已經出院，並表示：「太太30年前經歷過差啲死亡嘅事故，之後就患有創傷後壓力症候群，近日開始服用治療創傷後壓力症候群嘅藥物，不過服用後未見藥效，所以服用過咗醫生處分嘅藥量，先發生入院嘅事，並唔係傳聞中嘅『服用安眠藥自殺』，希望媒體能夠克制非事實嘅報道。」強調沈銀河唔係仰藥自殺。