港大百年校慶「8.18事件」令師生校友十分㷫，好多花生友即時陰謀論，指呢單嘢似係無間道所為，事關徐立之係中大出品，呢鋪仲唔一鋪打殘「百年老店」，港大舊生游清源日前亦喺自己個專欄話此事應該入中大數。
可想而知，呢句說話幾咁令中大人憤怒了，八方聽聞唔少中大校友，呢兩日心急等待「中大護法」阿香出手「修理」游清源，為中大人出返口氣，可惜，等咗兩日都唔見有動靜，搞到一群憤怒了嘅中大校友，幾乎想殺上阿香個辦公室，聲討護法失職，有乜理由喺關鍵時刻粒聲唔出！八方相信，阿香唔係花生友嚟嘅，佢唔出手，未到時候啫。