灣仔區議會主席黃英琦Ada近日為西九四出奔波,佢老公前工商局局長周德熙噚日亦加入聲援,喺電台節目力數特區政府不是,節目後八方搵周德熙再傾,佢強調兩公婆喺西九事件中冇夾埋,因為Ada係講道理嘅人,老公冇道理都唔聽,所以兩人絕對唔會講美國政治,事關周支持布殊仔,Ada就唔係。
周德熙又透露,Ada早前為灣仔喜帖街重建問題力抗市建局,灣仔區元老兼市建局董事林貝聿嘉同人講,可以試吓向周德熙埋手游說Ada,市建局行政總監林中麟信以為真,於是聽人點,約周生打波,周德熙話如果熟識佢兩公婆為人,一定唔會咁做,因為Ada幫理不幫親,佢話同林中麟唔係幾熟,就推咗個打波約會。
周德熙白頭宮女話當年,稱當年陳太受肥彭指示,喺西九起個大劇院上演歌劇,取代個運動場,至於點解愈吹愈大變成西九文娛區,佢都唔知發生乜事,莫非真係有人隻手遮天?
傳真︰2623-9278
電郵︰
[email protected]