半年前去咗加拿林註冊結婚嘅林奕匡，揀咗今日求婚一周年同太太Rikko補擺喜酒，招呼一眾親朋好友，仲會喺會場上播放當日求婚片段，林奕匡話太太當初要求過求婚要浪漫感動仲要拍低佢，所以佢就揀咗兩人最初相識時嘅回憶，話說當年阿Phil想抱當時仲係女朋友嘅Rikko由地下上到澳門嘅大三巴前，可惜當時唔夠力抱到一半就放棄咗，十年後阿Phil一口氣將Rikko抱到上大三巴前再突擊求婚，相當浪漫。

林奕匡喺會場抽空接受傳媒訪問，佢話：「本身今日諗住簡單啲搞個Party，好多謝咁多位同事幫手，但係都估唔到原來都好多嘢要籌備，噚晚都忙到凌晨兩點幾，去到最後一刻先搞掂晒所有嘢，所以噚晚都冇乜瞓過。」

Rikko就話：「冇瞓過唔係因為緊張，而係實在太興奮，其實十年前我哋兩個喺加拿大嚟到香港冇人冇物，一個親戚朋友都冇，今晚呢個晚宴就好似慶祝緊喺呢十年入面認識咗嘅所有朋友之間友誼嘅見證，所以我哋有唱歌跳舞環節，仲會拋花球，上次喺加拿大時間太趕，唔好話花球，連我同媽媽嘅合照都冇時間影。」

林奕匡話自己都三十歲，但係過去十年係自己一生之中最開心同埋成長得最快樂嘅十年，阿Phil話呢十年當中多得老婆Rikko一直喺佢身邊先可以咁快樂，希望從今以後可以照顧好太太，唔使佢擔心，可以一直幸福快樂。問到兩位幾時先打算生B？林奕匡話當時喺事業低谷時太太犧牲咗好多，希望o依家自己事業相對穩定時可以俾太太做自己鍾意嘅事，過多幾年先再考慮生仔。

而今日有到場做姊妹嘅黃美棋同男朋友鍾健威一齊接受訪問，講到今日有拋花球環節，係咪志在必得先？黃美棋笑言：「唔係呀，聽聞已經有Target，好似話阿Jay（馮允謙）都想成家立室，所以到時可能會拋俾佢女朋友，到時我都會識做。」問到幾時到佢哋時，兩位異口同聲都話未，鍾健威話：「冇咁快啦，今年逗咗好多利是，等我逗多幾年先啦。」黃美棋話：「等我飲多幾餐偷下人哋師先。」至於今朝接新娘環節，黃美棋話一切從簡，不過開門利是就唔少得，最終成班姊妹一人一封四位數字嘅利是。

精選娛聞，喺晒《娛果》
http://fb.com/appledailyent