當年今日
關於我們

隔牆有耳:fb多謝左報日日「宣傳」
國師教ATV復活 - 李八方

蘋果日報 2015/04/04 05:20

隔牆有耳亞視李八方大公報國師城邦論陳雲陳雲根紫荊雜誌

呢排左報可謂相當畀面國師陳雲,幾乎日日頭版報道佢嘅城邦論,仲話佢嘅支持者喺英國搞個港獨政黨,國師唔只沾沾自喜,喺facebook多謝左報將佢嘅城邦論宣傳畀大陸民眾知,仲大爆話亞視都搵過佢做節目,只係國師唔騷佢,不過國師算唔話得,醒咗條好橋畀亞視,講明可以「起死回生」咁巴閉!
話說國師喺佢fb講,呢排佢因為中共幫佢「宣傳」,搞到佢不知幾紅,好多人搵佢做訪問,佢起碼推咗三份報紙同一個香港嘅大學研究計劃,所以對《大公報》等左報日日砌佢,佢不知幾高興,仲多謝《大公報》報道全港公共圖書館有181本佢嘅城邦大作,變相提醒市民喺復活節長假期可以借閱,「有181本,保證可以借得到」。
至於《紫荊》雜誌、《大公報》話佢支持者喺英國成立香港獨立黨,國師喺fb講「《大公報》報導了,我才知道有港僑在倫敦註冊香港獨立黨」,之後佢越寫越興奮,竟然話可能遲啲要黨報報道,先知香港已變咗主權國家,「要迎接陳雲做臨時大總統」!
根據長期觀察國師嘅高登仔認為,國師去到要做臨時大總統,都應該係冇食藥居多,但咁仲未算,話愚人節當日收到被判不獲續牌的亞視嘅邀請,希望佢上節目講吓「香港本地意識」,但由於忙緊寫書,擔心電視訪問要花費好多時間拍攝,所以拒絕咗,但國師可謂唔話得,醒咗條好橋畀亞視,仲寫包單一定掂,「如果(亞視)拍攝城邦論專輯,可以起死回生」,叫亞視拍城邦論專輯?究竟國師係當真定當愚人節笑話先?八方噚日打畀國師,可惜佢冇覆。

李八方
mailto:[email protected]