黃子華嘅棟篤笑告別作《金盆o浪口》，之前秒殺門票，26場飛早已搶購一空，一票難求。個騷首場喺7月6日，距離開騷仲有一個禮拜，點知...繼之前五月天嗰迪士尼露天騷之後，黃牛又炒燶飛。

呢幾日喺社交平台，出現大量放飛情況，大部分都以原價放售，唔只連位，就連第一場騷都有飛放，當中以$880、$480嘅飛較多放售，而有啲就只係想換飛。香港呢邊炒唔起，但大陸淘寶網，仍堅持炒高幾倍。喺淘寶有人將啲飛炒高三、四倍，要成850人民幣至2,580人民幣（約港幣1,017元至3,089元）一張，仲騷出一大叠飛。不過有人掛羊頭買狗肉，寫住賣黃子華飛，但張相係周杰倫之前開騷嘅飛。

而大陸觀眾幫襯黃牛飛之前，就要聽下子華曾經咁樣講過，「呢一次，係一百份（之）零，唔係，係101%，香港本土嘅題目。所以如果我去第二度巡迴，係對大家不負責任。所以係唔會巡迴。同埋的而且確會係最後一個棟篤笑。咁呀……多謝大家留意。」

其實今年3月子華開騷優先買飛時，搞到黃牛黨瘋搶，最貴嘅$880門票炒到1.5萬元，認真誇張。而子華為咗呢件事，喺佢facebook度拍咗條片，當時佢知道有人炒飛，佢話比任何人更嬲，仲話︰「原本我預咗有兩場休息，你當我賺多啲錢又好，點都好博命做。」佢都係希望觀眾買到飛。

之後佢仲話：「喺度正式同政府提出，大家係咪時候正視呢樣嘢？」佢仲呼籲啲Fans、觀眾，唔好買黃牛！佢情願啲位空晒，都唔想大家買黃牛。而呢件事令特首林鄭月娥都有留意，之後仲開腔回應，叫康文署檢討是否令炒賣門票活動，成為一個刑事行為。

而子華加開場次，喺4月正式開買時，將超過15萬張門票，一次過推出發售，每人限買4張以杜絕黃牛，雖然當日都引來排隊黨搶飛，但起碼一啲真fans、真觀眾，真係買到飛。

精選娛聞，喺晒《娛果》
http://fb.com/appledailyent