摩笛唱港股!唔使怕,今次摩根士丹利唔單止冇唱淡,仲將港股唱到牛氣沖天!大摩噚日發表報告,就話依家恒指市賬率1.52倍,低過歷史水平,所以預期恒指年底可以升到32000點,以今日恒指收市報22041點,即係恒指今年仲有機會升多近萬點!
至於2015年港股,大摩既預測更加驚人。佢話如果全球量寬政策持續,加埋內地經濟保持復甦勢頭,到時恒指可以挑戰50000點,比現水平足足高出1.2倍。
不過大摩補充,如果美國提早退市,內地經濟放慢,本地樓市下跌,咁到時港股有機會跌到15200點。嘩!即係今年恒指預測介乎15200至32000,兩數差距16800點,玩大包圍,你講晒啦!
值得一提係陸東於2007年11月,曾預言恒指會於2008年最多升到42000。不過陸東發表呢個當時全城最牛預測後,港股好似食瀉藥咁狂瀉,由原本25500點樓上,跌到去2008年底最低10676點。
想睇更詳盡分析報道?請留意聽日《蘋果日報》!