以前港姐鬥靚鬥身高，不過近年嘅港姐選舉，就係鬥家底鬥學歷，12年民選港姐朱千雪，唔止有顏值，仲要有學歷，最難得係形象好有觀眾緣，就算o依家重返大學讀書，依然keep住曝光率。

又要拍劇又要返學，不過靚女唔愁冇男友，七月中，千雪BB就自爆有個喺新加坡做醫生嘅男友Justin，爸爸係茶莊老闆，家底有番咁上下。女神封盤，宅男心碎。千雪BB仲對呢位男友讚不絕口：「佢係幾好嘅，佢係圈外人，相處好舒服，發展好自然。」上月千雪BB仲同男友俾人影到同遊新加坡。不過，始終二人分隔異地，平時只能靠用視像，短訊等遠距離談戀愛。

日前，千雪BB出活動時，就自爆同男友要幾個月先見一次，下次再見面，就要到年底聖誕節。不過今日有周刊踢爆話，原來呢幾日，Justin就秘密返港，俾女友一個surprise，而千雪BB為爭取時間機會見男友，夜晚放工後，9秒9揸車到西貢男友寓所見面，同Justin溫馨短聚。報道話Justin住嘅屋苑保安都認得朱千雪，一見到佢架車已主動開閘，似乎嚟慣嚟熟。可惜千雪之後要返電視城開工，所以只係逗留咗兩個鐘左右就走喇。咁頻僕，都係為咗爭取時間見面啫。