當年今日
關於我們

中環價值 - 左丁山

蘋果日報 2004/12/06 00:00


龍應台喺《明報》發表長文,講西九龍、中區警署古蹟群,講到香港特區政府冇文化政策,民政事務局內冇高官負責文化事務……此文甚有影響,唔止文化界、學術界人士睇,盛傳董特首亦都睇到津津有味,話龍女士寫得幾好,唔怪得有位老友記出席民政事務局舉辦亞洲文化合作論壇之時,有啲面黑黑。
中環人都有注意噃,因為龍女士大文提到「中環價值」,究竟何謂中環價值呢?或可視之為唯利是圖,追求效率,做事夠專業,講法治多於講人情,講專業多於隨口噏……香港金融界、商界肯定擁抱「中環價值」。
台灣呢?商界專業界金融界到現在仍然烏垂垂,不知「中環價值」為何物。今期台灣《壹週刊》封面故事講台灣高鐵建設,歷時四年半,耗資五千億台幣,原訂今年十月開始進行嘅動態試車,一延再延,迄今無定期,再加上技術問題浮現,高鐵可能變成危險列車,日本專家認為台灣高鐵以政治為考慮。
嗱,以前台北捷運系統,今次台灣高鐵,台灣有大型基建項目,每每出現超支、延期、貨不對辦、貪污、政治派餅仔之事。呢類建設完工風險(completionrisk),台灣與第三世界國家就特別多,香港就極為罕見,香港地鐵東鐵西鐵啲久唔久就發生嘅行車延誤,與之比較,簡值係不足一提嘅小事。點解呢?香港有「中環價值」吖嘛。
唯利是圖遠遠好過唯人情是圖、唯政治是圖、唯擦鞋是圖。只要賺錢得其法,合乎法律,在任何監管機構訂下嘅規例及最佳守則(bestpractice)之內嘅,賺錢使乜向他人道歉?龍應台住在香港兩年,觀察敏銳,希望佢能將「中環價值」帶返台灣!