娛樂場所全面禁煙一個月，業界生意淡薄大叫救命，本身經營桑拿嘅娛樂服務業聯合總工會總幹事周鎮宇係苦主之一。佢同八方吐苦水，話條例生效後都好耐冇喺香港揼骨咯，唔係修心養性，而係因為佢鍾意一邊揼骨一邊煲煙，香港骨場禁煙，佢惟有北上揼骨繼續享受吸煙樂趣。

禁煙後全行劈價

連老細都北上消費，行業生意有幾難做可想而知，據講家桑拿揼骨收費大劈價，有啲場由每個鐘200幾蚊減到100蚊，但都留唔住客人；反而深圳行家話佢知，近排多咗兩成港客上去幫襯，真係要多謝香港政府。周鎮宇話自己被迫幫襯深圳行家都好無奈，「我身份特殊，俾人捉到喺個場食煙就大件事，所以成日警惕自己，因為行業代表唔可以知法犯法。」
香港幾乎全城禁煙，有40幾年煙齡嘅周鎮宇都話逼於無奈開始戒煙，費事成日偷偷摸摸食煙。佢以前日食超過一包，家一日只係食幾支，通常返屋企先食。不過佢話暫時未見身體健康咗，反而擔心戒煙後要成日食零食頂口癮，搞到體形暴肥，中年發福對健康可能仲唔好。