45歲演員鄭艷麗早年被周刊影到喺麥記做店員，淡出影圈多年，原來同圈中人施綺蓮、楊玉梅有連絡，今日有周刊指，日前鄭艷麗出席晚宴，將一頭白髮染黑，身穿寬身衫、化上淡妝嘅鄭艷麗，由施綺蓮同楊玉梅帶佢哋見一啲公司高層，鄭艷麗傾談時亦展現微笑，之涕佢又同黃百鳴、陳欣健聚舊，影下相，出席完宴會就返咗秀茂坪一個屋邨。

鄭艷麗1988年入行，出道時曾喺電視台拍劇，之後拍三級片《滅門慘案之借種》，後來成為台灣富商黃任中嘅契女，契爺病逝之後，佢回港發展，靠登台為生，最近一次演出係客串賀歲片《72家租客》。

《蘋果》致電陳欣健(Philip)了解鄭艷麗近況，佢一頭霧水表示：「個名咁熟，但唔記得喎！」記者指兩人有傾偈影相，Philip才恍然話：「嗰晚好多人，我冇同佢來往，佢以前係咪選過乜嘢姐？」記者指鄭艷麗拍過三級片，Philip表示：「我冇睇，但你講起我記得下，佢同我say hello，anyway我覺得好熟口面好親切，大家影張相。」對於鄭艷麗早前被發現喺麥當勞工作，現住公屋，經濟拮据，問到會唔會幫吓對方？Philip話：「係咩，我真係唔知，因為佢唔係我朋友圈，我都冇機會，連佢電話都冇，點幫，美麗嘅誤會。」