當年今日
關於我們

【英超】伊巴插哥帥:我遇過最唔成熟嘅教練!

蘋果日報 2017/12/13 20:15

曼城巴塞隆拿曼聯美斯伊巴謙莫域

曼市打吡賽後發生更衣室開片風波,雙方近幾日互相指責,哥迪奧拿早前就維護班曼城球員,話唔覺慶祝過火,而呢邊廂曼聯前鋒伊巴謙莫域就突然舊事重提,話當年同哥帥喺巴塞共事不歡而散,係因為對方喺人事管理方面唔成熟,亦係佢一生遇過最差嘅處理手法。
眾所周知伊巴同哥帥嘅過節,始於八年前一同效力巴塞隆拿時;哥帥為咗圍繞美斯建立球隊,用完伊巴一季發現唔啱用,就將佢踢走,呢件事令伊巴一路覺得係人生污點,離開後亦多次批評過呢位世界級教頭。
最近,伊巴又重提雙方恩怨嘅始末:「其實頭六個月喺巴塞都冇事,然後教練改咗戰術同陣式,亦完全唔啱我。我走去同佢講呢個問題,問係咪因為要犧牲部份球員去成就一個美斯,佢話唔係,仲話會顧及所有人感受,設法解決問題。不過,之後我連續幾場都仍然係後備,就想走去同佢再傾,點知佢開始拒絕對話,只要我一見到佢,佢就掉頭走......」
伊巴補充:「我唔覺得佢係壞人,但就係我遇過最唔成熟去解決問題嘅人。」伊巴當年效力巴塞僅一季,就喺2010年夏天被借去AC米蘭,一年後合約更被買斷。
----------
球迷一定要知!英超一哥曼城,已經登陸『BFB』!登入即送藍月球星: http://bit.ly/2AAiPDS