容天鵬馬房今季較為慢熱，至今仍只得11場頭馬，明顯比去季同期少。但近三個賽日亦獲得兩場頭馬，馬房成績正在回起當中。

鵬哥周日（17日）派出9匹馬參與賽事，其中大部份都於今晨（13日）進行最後試跑，《蘋果馬經》晨操專家積奇對部份戰馬都有不俗評價。

「英之友」跳一段，走中檔，馬身喼得靚，毛水鮮明，担高頭神態軒昂，落腳輕盈，當打馬勇況持續；「中華壹號」蔡明紹跳兩段，戴頭罩走中檔，馬身喼得靚，毛色深潤，過步爽神態旺，上仗有追勢，復課勇態續添。

「嘉應傳奇」副練跳一段，戴頭罩，勤操馬身收好，落腳整齊有力，論狀態唔曳；「再享耆成」楊明綸跳一段，走過神閒氣定，晨課表現好愚魯，論態保持贏馬水準。

「再享耆成」上仗初上三班作賽，自外檔出閘耗力甚多，末段仍力捱得第三名，第四名之「安騏」再出亦順利轉場補中。今次對手大幅轉弱，「再享耆成」有望重踏勝軌。

-----------------------------------------
10萬蚊 100人分！
星期一至五晚上10點半
《動腦Q》Let's Q the money！
http://bit.ly/2QW8LcI