大家睇開《金手指》，都應該知道孫柏文除咗係白銀戰隊隊長外，仲係頁岩氣解放軍司令，真係銜頭多到媲美域多利皇后。咁因為好似六年前嘅白銀一樣，今時今日頁岩石天然氣仲係一個偏門到得我會講嘅嘢，所以今日要同大家更新吓頁岩氣，特別係大陸頁岩氣業嘅最新發展。今年初，喺我篇《一注獨贏珠江鋼管》嘅文裏面，解釋過頁岩石天然氣同普通天然氣嘅分別。咁解放頁岩石中天然氣仲係新科技，所以各地勁需要廉價能源都好，政府就算想極速開發，都小心行事。中國見花旗國大量開採，不但令能源價格大幅下滑，仲要因天然氣遠比煤炭、石油乾淨，所以更令花旗國用嘅每單位能源及碳排放跌，跌得快過押重注落風力、太陽能嘅歐洲。頁岩氣喺經濟同環保上都係最make sense嘅新能源，所以中央9月11日舉行咗開採頁岩氣嘅第二次招標。唔同第一次淨係畀六間國企入標，今次係開放畀外國油公司參與。最後有75個單位入標，唔少係外國油公司嘅中外合資企業。中央有意唔想畀三大油公司壟斷住，理由係佢哋唔識開採。