「忘不了的，年月也不會蠶蝕，心中深處始終也記憶那年那夕……」六四事件雖然已經發生咗19年，但相信大家對當年發生嘅事仍然歷歷在目，眨吓眼出年就係六四20周年，八方知道支聯會十分重視出年六四活動如何安排，19周年悼念活動未搞完，已經開始籌備出年嘅事。

計劃全球各地搞悼念

支聯會月前已成立一個專責小組，負責籌備六四20周年悼念活動，由主席華叔親自領導，初步會廣泛聯絡海外民運組織及民運人士，希望明年可以合作，喺全球各地大搞悼念活動。平反六四、追究屠城責任唔使多講，一定係悼念活動核心主題，至於如何配合最新國情，藉六四20周年探討中國人權狀況同民主化發展，就有待從長計議，具體活動稍後先會落實。
好多人擔心新一代忘記六四，有支聯會中人同八方講唔使太擔心，因為近年仍有一定數量學校主動邀請支聯會向學生講述六四歷史，分析事件前因後果，事實上支聯會網頁資料十分豐富，只要有心，唔怕歷史會被遺忘。