早前有指內地真人騷《爸爸去哪兒》因為過度消費明星、明星子女，不利青少年健康成長，被國家廣電總局叫停。而製作節目嘅湖南衛視為回應指控提出停播相關有問題嘅節目，答應今年內唔會播出《爸爸去哪兒5》（相關新聞： http://bit.ly/2wv1NTL ）。

而有份演出《爸爸5》嘅陳小春今日出席《黑白迷宮》首映，接受訪時問到小春有冇為囝囝Jasper將來做準備，佢就話：「梗係要啦！去第二度讀書就唔想佢去o架喇，點會捨得呀，希望一直跟住佢。」小春仲話囝囝不嬲佢都好黐佢岳父、岳母同老婆，而喺屋企都係講國語同英文，問到喺咪因為小見，搞到囝囝唔黐爸爸，小春話：「盡量擺多啲時間畀佢，但佢都唔肯講廣東話。」

問到小春《爸爸5》有傳被抽起，會唔會感到失望？小春話：「其實都冇聽過話會抽起，劇組都會照舊，因為我都仲會繼續拍嘅，聽日仲會繼續去。」《爸爸5》被指過度消費啲明星子女，問小春作為親點睇？佢話：「開頭都有咁嘅感覺，作為父母，參與咗之後覺得係我同個仔兩個人嘅交流，中間拍攝時有好多點點滴滴，我覺得係好正嘅，其他嘢就唔係好覺喇。」

至於之後佢哋會唔會父子檔，或者一家人拍廣告？小春答：「未必喇，今次都係老婆叫我去嘅，叫我同個仔去『磨』吓（擦出火花），因為遲啲返學就冇機會㗎喇！開頭我都係抗拒嘅，但玩咗一次之後真係覺得好正！就喺節目度講一句、頂一句，係真係有回答，平時係感覺唔到有呢樣嘢嘅，好似話我叫佢『做乜行咁快？』佢就會用英文駁番我，係好好笑嘅，我好enjoy！」小春仲話劇組冇叫停，所以聽日會繼續去。