ViuTV《全民造星》十強參賽者姜濤、楊樂文（Lokman）、龍志權、梁業（肥仔）、江熚生（Anson Kong）、應智越（細貓）、陳卓賢（Ian）、呂爵安（Edan）、邱士縉（Stanley）同李駿杰（Jeremy），今日喺銅鑼灣為總決賽進行拉票，吸引近600位Fans到場，逼爆商場每一層，全場尖叫聲不絕；當中，以姜濤Fans最多，亦霸到最有利位置，其次就係Lokman、Anson Kong，就連甘比妹妹都要同姜濤合照。喺Anson Kong出場時，有Fans大叫：「Anson Kong，我愛你！」細貓亦好識做，向Fans們派上大心同細心，但當壓軸嘅姜濤現身時，全場歡呼大叫！之後佢哋獲安排分別上台表演，喺活動尾聲，佢哋就落台向Fans派閃卡、自拍兼拉票。

今次賽制中，市民可以一人一票投票參與，不過眼見姜濤Fans最多，燈牌最多，估計大多票數落喺姜濤身上，不過姜濤一班戰友們未有眼紅佢，細貓話：「呢個觀眾嘅喜好，我只能夠做好自己，雖然我做唔到佢哋心目中嘅no.1，但有佢哋嘅認同已經足夠。」Lokman表示：「冇得怕，大家鍾意嘅嘢都唔同，我相信有唔少人都支持我，我有信心攞冠軍。」Anson Kong就話：「我做啲咩都好難拉到姜濤啲Fans，Fans忠於偶像係正常，我唯有吸納多啲新Fans，喺社交平台上面上載多啲自己嘅片同相。」問到佢哋會唔會嘗試騷肌吸晴？Anson Kong二話不說拉高上衣，展示6嚿腹肌：「不嬲都有，我跳舞要做Sit up。」總決賽當晚騷肌？佢笑住話：「諗緊，考慮下剝衫呢個環節。」

講到姜濤最多Fans支持，佢即刻話：「唔係，大家差唔多，可能我啲Fans早到，佢哋都好辛苦。」有冇遇過瘋狂Fans？姜濤表示：「未遇過，但有啲都會等我，（跟你返屋企？）佢哋唔知我住邊，因為我返屋企好神秘，等人少啲先返，因為我唔想騷擾到屋企人。」姜濤受訪時，節目監製花姐喺旁邊睇實，似乎有啲偏心姜濤，姜濤聞言即解畫：「因為我係最唔識講嘢，成日懵下懵下，佢睇住我有冇答到九唔搭八。」提到Anson Kong有腹肌，姜濤笑住話：「大家都有，爭在佢嗰個睇到，我嗰個睇唔到，收埋咗。騷肌？我諗喺呢個演藝生涯上唔再騷。」此外，花姐透露總決賽當晚，會有劉偉強、周慧敏、Lady Gaga排舞師Travis Payne、ViuTV總經理魯庭暉及環球董事總經理黃劍濤擔任評判。問到ViuTV係咪簽姜濤同Anson Kong？花姐話：「我做細，大老闆唔會同我講，如果真係簽佢哋，我好開心！」

精選娛聞，喺晒《娛果》
http://fb.com/appledailyent